潛能助理

有天, 成熟同事問︰「你懂得那個陳智遠嗎？」

我說︰「(For GOD’s SAKE!!) 我當然不認識他。只是從連日報章知道他曾任職城大亞洲管治研究中心高級研究助理及香港中文大學政治與行政學系兼職講師, 由原本的月薪加起來約3萬元飛上枝頭變鳳凰變成月薪13.4萬元(！)的高級助理人員, 令人既羨慕又妒忌, 不過也是有一點點的驚喜(！)。對於我們那些讀政治又一心想投身政府的同學們是個天大的喜訊啊！便是我們的政府自回歸以後, 變得青黃不接, 現在不需要考那些無無謂謂的Common Recruitment Examination (CRE), 或者熟讀基本法去應付那個 Basic Law Test。我們那個極具高透明度的特區政府終於拋開了這些包袱, 真真正正實踐了唯才是用, 不論年齡(！)，不計資歷(！)，最重要是有食(實？)力、有潛能(潛水怕屈機？)，我哋係唔應該因為人家三十未出頭，就小看人家的。」

成熟同事又問︰「政府那些D Grade的人士, Directorate Pay Scale都要到D4才有15-16萬元的月薪, Master Pay Scale個Maxi都只係8萬幾…現在這個28歲嘅後生仔都唔知做咗幾耐嘢就攞到咁嘅人工, 佢哋有排揼心口！還有那些爭崩頭的一眾AO呀…」

我說︰「也不是呀！現在香港的social upward mobility係高到歐美國家簡直望塵莫及, 一個公平嘅社會就係咁樣, 我們那些新一代的目標也應該改向政府邁進, 記得早年科技泡沫未爆嘅時候讀U就一窩蜂咁讀IT, 之後IT爆咗又一窩蜂咁去讀工管, 早排全民皆股嘅時候乜書都唔駛讀, 攞哂d Grand Loan去炒就得。而家一個IT人加工管加三年工作經驗, 再炒埋股都冇可能賺到13.4萬一個月？我估最好都係從政！因為香港從政不論問責唔問責嘅官都有官威, 做錯嘢都唔駛死嘅, 最多搵個「獨立」調查小組調吓！調吓！再調吓…開幾個會再寫呀！寫呀！寫幾頁Report, 跟住先發現「原來」係個程序出咗問題喎, 結果永遠都係冇人需要負責嘅！咁既工喺邊度搵？最重要既係局長都要間唔中出來解吓話或者做親民show露兩手呀咁, 但助理呢…係永遠唔駛拋頭露面嘅, 政府真係求才若渴, 話唔定你同我都會有一日可以飛上枝頭變鳳凰呢… …最重要嘅係新班子要執政起嚟都唔知需要幾多個咁嘅高薪助理, 呀！唔係…係高級助理先係, 咁只要我哋泊到一個好碼頭, 同啲政黨關係搞好啲, 或者下一個幸運兒就係你同我呢！」

成熟同事猛力點頭和議︰「係喎！等我快啲搞個Roundtable, 希望早日有人睇到我啲潛！能！」